Ayni paytda beldagi og‘riqlar 3 ta asosiy guruhga ajratiladi:

1. Nospetsifik (skelet-mushak tizimi bilan bog‘liq)
2. Spetsifik (shikastlanish, o‘sma, infeksiya va boshqalar)
3. Kompression radikulopatiya natijasida yuzaga kelgan

Disk churrasi bilan bog‘liq og‘riqlar uchinchi guruhga kiradi va beldagi barcha og‘riqlarning 7% gacha tashkil qiladi. Shuni ta’kidlash kerakki, umurtqalararo disk churralari bel og‘rig‘idan shikoyat qilmaydigan 60-70% odamlarda aniqlanishi mumkin.

Bundan qanday muhim xulosa chiqarishimiz mumkin? Disk churrasi har doim ham og‘riqqa sabab bo‘lavermaydi! Ko‘pchilik odamlarda disk churrasi bor, lekin bu ularning bel og‘rig‘idan aziyat chekishini anglatmaydi.
Disk churrasi bel og‘rig‘iga sabab bo‘ladimi yoki yo‘qligini aniqlash uchun vertebrologda neyro-ortopedik tekshiruv o‘tkazish, MRT/MSKT tasvirlari va laboratoriya tadqiqotlari ma’lumotlarini o‘rganib chiqish va baholash kerak.

Davolanish haqida gaplashishdan oldin, keling, anatomiyani biroz ko‘rib chiqaylik. Disk umurtqalar orasidagi elastik tog‘ay qatlam hisoblanadi. U qo‘shni umurtqalarni bir-biriga bog‘lash, butun umurtqa pog‘onasiga egiluvchanlik va amortizatsiya berish vazifasini bajaradi. Disk yumaloq shaklga ega bo‘lib, u markaziy qism - pulpoz yadro va tashqi qism - fibroz halqadan tashkil topgan. Disk bo‘rtib chiqqan, ammo fibroz halqa yirtilmagan holat protruziya deb ataladi. Agar fibroz halqa yorilsa va pulpoz yadro tashqariga chiqsa, bu holat disk churrasi deb nomlanadi.
Ilgari disk churrasi, unda asab tolalari yo‘qligi sababli, og‘riq keltirmaydi deb hisoblangan, biroq tadqiqotlar disk chetlarida asab tolalari mavjudligini aniqladi. Shunday qilib, beldagi og‘riqning sababi disk churrasining o‘zi bo‘lishi mumkin, shuningdek, churra va asab o‘rtasidagi to‘qnashuv ham og‘riqqa olib kelishi mumkin. Bunday holda, qo‘shimcha ravishda oyoq yoki qo‘lda ham alomatlar paydo bo‘lishi kuzatiladi.
Xo‘sh, disk churrasi kasalligida qanday davolanish olib boorish kerak bo‘ladi?
Disk churrasini konservativ (operatsiyasiz) va jarrohlik yo‘li bilan davolash mumkin.
Operatsiya o‘tkazilishi uchun obyektiv ko‘rsatmalar mavjud bo‘lishi kerak. Umuman olganda, barcha churralarning 3-5% jarrohlik davolashni talab qiladi. Churra mavjudligi operatsiyaga ko‘rsatma bo‘lib hisoblanmaydi.
Disk churralarining aksariyat qismi konservativ usulda davolanadi. Disk churralari so‘rilib ketishi mumkin. Bu fenomenni ancha vaqtdan beri hech kim inkor etmaydi. Churra so‘rilish jarayoni rezorbsiya deb ataladi.

Rezorbsiya - bu tabiatan tanamizga xos bo‘lgan tabiiy fiziologik jarayondir! Bu jarayon immun tizimimiz faoliyati tufayli amalga oshadi. Immun tizim churra to‘qimasini begona deb qabul qiladi va uni so‘rish mexanizmlarini ishga tushiradi.


Rezorbsiya uchun optimal sharoit yaratish konservativ davolashning vazifasi hisoblanadi. Bizning klinikamizda biz igna sanchish va zamonaviy yuqori intensiv fizioterapiyani birlashtiramiz, dori vositalarini qabul qilishni minimallashtirishga, shuningdek, optimal jismoniy reabilitatsiya dasturini (davolash mashqlari) tanlashga harakat qilamiz. Kompleks yondashuvni qo‘llash natijasida churra bo‘rtib chiqishi hajmini sezilarli darajada kamaytirish, og‘riq sindromini to‘xtatish va bemorga yaxshi hayot sifatini qaytarish imkoniyati mavjud.